click here for more news about Hormuz Strait
Reporter: Divya Vani | localandhra.news
(Hormuz Strait) ఇరాన్‌పై అమెరికా వాయు దాడుల నేపథ్యంలో ప్రపంచ చమురు రంగం ఒత్తిడిలో పడింది. దీనికి ప్రతిస్పందనగా, హర్మూజ్ జలసంధిని మూసివేయాలని ఇరాన్‌ పార్లమెంట్‌ ఆమోదం తెలిపింది. అయితే తుది నిర్ణయం, ఆ దేశ అత్యున్నత భద్రతా మండలి చేతుల్లో ఉంది. ఇది అమలవుతే, ప్రపంచవ్యాప్తంగా చమురు సరఫరాపై తీవ్ర ప్రభావం పడనుంది.పర్షియన్ గల్ఫ్‌ను అరేబియా సముద్రంతో కలిపే ఈ మార్గం ప్రపంచంలో అతిపెద్ద చమురు రవాణా మార్గాల్లో ఒకటి. ప్రతి రోజు ఇక్కడి నుంచి దాదాపు 2 కోట్ల బ్యారెళ్ల ముడి చమురు, 29 కోట్ల క్యూబిక్ మీటర్ల ఎల్‌ఎన్‌జీ వివిధ దేశాలకు వెళ్తుంది. ఈ మార్గం మూతపడితే, చమురు ధరలు ఆకాశాన్ని తాకే ప్రమాదం ఉంది.ఇరాన్‌ను ఆపేందుకు అమెరికా విదేశాంగ కార్యదర్శి మార్కో రూబియో, చైనాను చొరవ చూపమని కోరారు.(Hormuz Strait)
హర్మూజ్ మూత వల్ల అంతర్జాతీయ మార్కెట్లు బాగా దెబ్బతింటాయని ఆయన హెచ్చరించారు.పెట్రోలియం మంత్రి హర్దీప్ సింగ్ పూరి ప్రకారం, భారత్‌కు ప్రస్తుతం కొన్ని వారాల చమురు నిల్వలు ఉన్నాయి.భారత దేశం ఇప్పటివరకు హర్మూజ్‌పై ఆధారపడటం తగ్గించింది అని మంత్రి పేర్కొన్నారు. ప్రస్తుతం రోజుకు 55 లక్షల బ్యారెళ్ల చమురు దిగుమతిలో 20 లక్షల బ్యారెళ్ల వరకు మాత్రమే హర్మూజ్ ద్వారా వస్తోంది.ఇప్పుడు భారత్‌ రష్యా, బ్రెజిల్, అమెరికా వంటి దేశాల నుంచి ఎక్కువ చమురు దిగుమతి చేస్తోంది. రష్యా నుంచి వచ్చే చమురు హర్మూజ్ మార్గాన్ని ఉపయోగించదు. అది సూయజ్ కాలువ లేదా పసిఫిక్ మహాసముద్రం మార్గాల్లో వస్తుంది.భారత ప్రభుత్వం గత కొన్ని సంవత్సరాలుగా చమురు సరఫరా మార్గాల వైవిధ్యంపై దృష్టి పెట్టింది.
దీనివల్ల హర్మూజ్ మూత పెద్దగా ప్రభావం చూపదు.ఇది మోదీ నాయకత్వంలో తీసుకున్న ముందస్తు నిర్ణయాల ఫలితం” అని మంత్రి చెప్పారు.భారత నౌకాదళ మాజీ అధికారిక ప్రతినిధి కెప్టెన్ డీకే శర్మ ప్రకారం, షిప్పింగ్‌లో జరిగే ఏ మార్పు బీమా ఖర్చును పెంచుతుంది. ఈ మార్గం మూతవుతే రవాణా ఖర్చు పెరుగుతుంది. ఫలితంగా చమురు ధరలు మరింత ఎగసే అవకాశముంది.ప్రస్తుత పరిణామాలు చూస్తే, ముడి చమురు ధరలు బ్యారెల్‌కు 100 డాలర్లకు చేరే అవకాశముందని నిపుణులు అంచనా వేస్తున్నారు. ప్రపంచవ్యాప్తంగా ఆర్థిక వృద్ధి లక్ష్యాలకు ఇది పెద్ద ముప్పుగా మారవచ్చు.అమెరికా రక్షణ విభాగ మాజీ అధికారి మైఖేల్ రూబిన్ ప్రకారం, హర్మూజ్ మూతచేస్తే ఇరాన్‌ స్వయంగా నష్టపోతుంది.
ఆసియాకు వెళ్లే చమూరులో 44 శాతం ఈ మార్గం ద్వారానే వెళ్తోంది. దీనిలో ఎక్కువ భాగం చైనాకు చెందినదని ఆయన పేర్కొన్నారు.ఇరాన్‌ ఈ చర్యకు వెళ్లినట్లయితే, అమెరికా సహా బ్రిటన్, ఫ్రాన్స్ వంటి దేశాలు తీవ్రంగా స్పందిస్తాయని అమెరికన్ విశ్లేషకుడు జోనాథన్ స్కాంజర్ అన్నారు. ఇది ఆత్మహత్యా చర్యగా మారుతుందని ఆయన పేర్కొన్నారు.ఇరాక్‌, సిరియా, లెబనాన్‌, యెమెన్‌ వంటి దేశాలతో భారత్‌ భారీ వాణిజ్యం నిర్వహిస్తోంది. వారితో 8.6 బిలియన్ డాలర్ల ఎగుమతి, 33.1 బిలియన్ డాలర్ల దిగుమతి జరుగుతోంది. హర్మూజ్ మూత వల్ల రవాణా ఖర్చు పెరిగి వాణిజ్య వ్యయం పెరుగుతుంది.అంతర్జాతీయ రాజకీయ వర్గాల్లో ప్రస్తుతం హర్మూజ్ జలసంధి అంశం వేడెక్కుతోంది. ఇది చమురు మార్కెట్లనే కాక, దేశాల మధ్య వ్యూహాత్మక సంబంధాలపై కూడా ప్రభావం చూపనుంది. ఇది జాతీయ భద్రత, వాణిజ్య రంగాలపై ఒక సవాలుగా మారే సూచనలు కనిపిస్తున్నాయి.
